न्यान्सी खड्का (बायाँ), अनमोल केसी र प्रिन्सी खतिवडा ।
राष्ट्रिय
समाचार.
- निर्देशक तथा अभिनेता भुवन केसीले आगामी फिल्म ‘बाटुलो जुन’ को दोस्रो चरणको छायांकन शुक्रबारदेखि सुरु गरेका छन्।
- पूर्वमिस नेपाल इन्टरनेसनल न्यान्सी खड्का ‘बाटुलो जुन’ फिल्ममा कास्ट भएकी छन् र पाटनस्थित बगलामुखी मन्दिरमा उनको परिचय गराइएको छ।
- फिल्मको बाँकी छायांकन काठमाडौं, बागलुङ, काभ्रेपलाञ्चोक, मकनवानपुर र पोखरामा गरिनेछ र बजेट २५ लाख रुपैयाँ रहेको छ।
काठमाडौं । निर्देशक तथा अभिनेता भुवन केसीले आगामी फिल्म ‘बाटुलो जुन’ को दोस्रो चरणको छायांकन शुक्रबारदेखि थालेका छन् । त्यसअघि आयोजित एक कार्यक्रममा थप कास्टबारे जानकारी दिइयो ।
यो फिल्ममा पूर्वमिस नेपाल इन्टरनेसनल न्यान्सी खड्का अनुबन्धित भएकी छन् । ‘१२ गाउँ’ डेब्यू सुन्दरीको यो दोस्रो कथानक प्रोजेक्ट हो ।
पाटनस्थित बगलामुखी मन्दिरमा शुक्रबार बिहान आयोजित पूजामा न्यान्सीलाई पनि कास्टको रुपमा परिचय गराइयो । यो फिल्ममा यसअघि अनमोल केसी र प्रिन्सी खतिवडा, प्रकाश घिमिरे, रेयर राई लगायत अनुबन्धित छन् ।
असारमा धादिङको नौबिसे क्षेत्रमा पहिलो चरणको छायांकन गरिएको थियो । त्यतिबेला निर्माताले अनमोल र प्रिन्सीको रोमान्टिक टिजर पोस्टर पनि बाहिर ल्याएका थिए ।
बाँकी छायांकन काठमाडौ, बागलुङको ढोरपाटन, काभ्रेपलाञ्चोक, मकनवानपुरको चित्लाङ र पोखरा लगायतका स्थानमा गरिने जनाइएको छ । पटकथा लेखन सामिप्यराज तिमिल्सेना र सरिन पोखरेलको छ ।
सनराइज प्रालिको ब्यानरमा जिया केसीको लगानीमा फिल्म बन्न लागेको हो । चलचित्र विकास बोर्डमा भने फिल्मको बजेट २५ लाख रुपैयाँ उल्लेख छ । यदि यसो हो भने, यो फिल्म अनमोलको करिअरकै सबैभन्दा कम लगानीको फिल्म हुनेछ ।