काठमाडौं, वैशाख २१
प्रतिनिधिसभाको आजको बैठक सुरु भएलगत्तै श्रम संस्कृति पार्टीका सांसदहरूले आआफ्नो स्थानबाट उठेर सभामुख डोलप्रसाद अर्याललाई आफ्नो धारणा राख्न समय दिन माग गरेका छन् । आफ्नो धारणा राख्न पार्टीका अध्यक्ष हर्कराज राईलाई समय दिइएको छ।
यस अवसरमा अध्यक्ष राईले प्रधानमन्त्री र मन्त्रीहरुलाई प्रतिनिधिसभाको बैठकमा नियमित रुपमा उपस्थित भई सांसदहरुले उठाएका प्रश्नहरुको जवाफ दिन आग्रह गरे ।
प्रधानमन्त्री बालेन्द्र शाहले गृह र रक्षा मन्त्रालयको जिम्मेवारी सम्हालेका बेला सीमा सुरक्षा र सुकुम्बासीको व्यवस्थापनलगायतका विषयमा जवाफ दिन पनि उनले सरकारको ध्यानाकर्षण गराए।
अध्यक्ष राईको भनाइप्रति आफ्नो ध्यानाकर्षण भएको जानकारी दिँदै सभामुख अर्यालले बुधबार श्रम संस्कृति पार्टीका सांसदहरूलाई आ–आफ्नो ठाउँमा आउन आग्रह गरे। सरकारलाई संसदप्रति जवाफदेही बनाउन माग गर्दै पार्टीका सांसदहरुले संसदमा प्लेकार्ड बोकेर विरोध प्रदर्शन गरेका थिए ।