नक्सालस्थित नेपाल प्रहरी हेडक्वार्टर । तस्वीर : नारायण अधिकारी/अनलाइनखबर
१३ कात्तिक, काठमाडौं । नेपाल प्रहरीमा ६ वरिष्ठ उपरीक्षक (एसएसपी)को दरबन्दी रिक्त भएको छ ।
भुपेन्द्र खत्री, सानुराम भट्टराई, ओम अधिकारी, शेखर खनाल र अबिनारायण काफ्ले डीआईजी बढुवाका लागि सिफारिस भएपछि ५ एसएसपी रिक्त भएको हो ।
बुधबार मात्रै सुदूरपश्चिम प्रदेश प्रहरी कार्यालयमा कार्यरत अर्का एसएसपी प्रकाश रानाभाटले राजीनामा दिएपछि रिक्त एसएसपीको संख्या ६ पुगेको छ । रिक्त ६ एसएसपी पदका लागि बढुवा सिफारिस समितिले गृहकार्य सुरु गरेको छ ।
अहिले बढुवा सिफारिस भएका डीआईजीहरू बढुवा भएर दर्ज्यानी चिह्न लगाएको अवस्था र रानाभाटको राजीनामा स्वीकृत भएपछि एसएसपीमा बढुवा गर्नेगरी तयारी अघि बढाइएको छ ।
बढुवा सूचीको पहिलो नम्बरमा बिमल बस्नेत छन् । उनी २०५३ मा राष्ट्रिय अनुसन्धान विभागमा भर्ना भएर प्रहरीमा स्थानान्तरण भएर आएका अधिकृत हुन् । बस्नेत यसअघि पनि पटकपटक बढुवामा छुट्दै आएका थिए ।
पछिल्लो पटक गत साउनमा भएको बढुवामा छुटेपछि बस्नेतले बढुवा सिफारिसविरुद्ध उजुरी नै दिएका थिए ।
बढुवा सिफारिसको सूचना सार्वजनिक भएको मितिले ७ दिनभित्र उजुरी गर्न सकिने व्यवस्था प्रहरी नियमावली २०७१ मा उल्लेख छ । सोहीअनुसार उनले उजुरी गरेका थिए । आफू सिनियर हुँदाहुँदै पटकपटक बढुवामा छुटाइएको उनको तर्क थियो ।
५ साउनमा बढुवा सिफारिस समितिले ११ जना एसपीलाई बढुवाका लागि सिफारिस गर्दा बस्नेत छुटेका थिए ।
त्यतिबेला तुलबहादुर कार्की, राकेश सिंह, राजीवबहादुर बस्नेत, कमल थापा, प्रवीण धिताल, प्रकाश रानाभाट, ज्ञानेन्द्रप्रसाद फुयाल, दीपक पोखरेल, दयानिधि ज्ञवाली, दीपेन्द्र शाही र केदार खनाल बढुवाका लागि सिफारिस भएका थिए ।
आफूभन्दा ५ वर्ष जुनियर बढुवा हुँदा पनि छुटाइएको आरोप बस्नेतको छ । बस्नेत यसअघि कर्णाली प्रदेशको ट्राफिक प्रमुख हुँदा आर्थिक अनियमिततामा मुछिएका थिए । त्यसपछि एक वर्ष बढुवा रोक्का गरिएको थियो । रोक्काको अवधि सकिँदा पनि पटकपटक छुटाइएको आरोप उनको छ ।
बस्नेतले दिएको उजुरीमाथि छानबिन भएर फर्स्योट पनि भइसकेको छ । उजुरीअनुसार बढुवा सिफारिस तलमाथि भएन । त्यसो हुँदा बस्नेतको कार्यसम्पादन मूल्यांकनको अंकबाट थप २ अंक घट्ने निश्चित छ ।
बढुवा सिफारिसविरुद्ध दिएको उजुरी पुष्टि नभए पनि अंक घट्ने प्रहरी नियमावलीमा उल्लेख छ । पुष्टि नभए पहिलो पटक उजुरी गर्नेको २ अंक काटिने र दोस्रो पटकदेखि ३ अंकका दरले अंक काटिने व्यवस्था नियमावलीमा छ ।
जसअनुसार बस्नेतको २ अंक काटिएको छ । २ अंक कट्ने भएकाले बस्नेत यो पटक पनि बढुवामा पर्छन्/पर्दैनन् भन्ने प्रश्न निकै पेचिलो बनेको छ ।
बस्नेतपछि दोस्रो नम्बरमा रामप्रकाश शाह प्रतिस्पर्धामा छन् । उनी पनि राष्ट्रिय अनुसन्धान विभागमा २०५५ सालमा भर्ना प्रहरीमा स्थानान्तरण भएर आएका अधिकृत हुन् ।
त्यसपछि भने २० माघ २०७७ मा एसपी भएका अधिकृतहरू बढुवाको प्रतिस्पर्धामा छन् ।
जसमा भुवनेश्वर तिवारी, ऋषिराम कँडेल, सुरेशप्रसाद काफ्ले, अमरेन्द्रबहादुर सिंह, श्याम सिंह चौधरी, नहकुल पोखरेल, पदमबहादुर विष्ट, सुवासचन्द्र बोहरा, वासुदेव खतिवडा, प्रजित केसी, राजकुमार सिलवाल, योगेन्द्रसिंह थापा, महेन्द्रकुमार श्रेष्ठ, दिलिप घिमिरे र वीरेन्द्रबहादुर शाही छन् ।
उनीहरूमध्येबाटै ६ जना एसएसपी बन्ने छन् भने बाँकी एसपीमै रहने छन् ।
(function (d, s, id) var js, fjs = d.getElementsByTagName(s)[0]; if (d.getElementById(id)) return;
js = d.createElement(s);
js.id = id;
js.src = "https://connect.facebook.net/en_US/sdk.js";
fjs.parentNode.insertBefore(js, fjs);
(document, 'script', 'facebook-jssdk'));
Read More