५ मंसिर, गोरखा । लाइन बिस्तार भएको करिव चार वर्षपछि गोरखाको लाप्राकमा केन्द्रीय प्रसारण लाइनको बिजुली बलेको छ । धार्चे गाउँपालिका वडा नम्बर ४ मा पर्ने उक्त बस्तीमा बिहीबारबाट विद्युत प्रवाह गरिएको नेपाल विद्युत प्राधिकरण गोरखा वितरण केन्द्रले जनाएको छ ।
प्राधिकरणका गण्डकी प्रादेशिक कार्यालय प्रमुख विक्रमकुमार अमात्य र वडाध्यक्ष किसान गुरुङले संयुक्त रुपमा वडा कार्यालयमा बिजुली बालेर केन्द्रीय प्रसारण लाइनको उद्घाटन गरेका छन् ।
‘वडा कार्यालयमा मिटर बक्स जडान गरेर बिजुली बाल्यौं,’ कार्यालय प्रमुख चीजबहादुर गुरुङले भने, ‘बस्तीका घरधुरीमा मिटर जडानको काम भइरहेको छ ।’ मिटर बक्स जडान भएसँगै घरघरमा बिजुली बल्ने उनले बताए ।
उनका अनुसार पहिलो चरणमा ६० घरधुरीमा मिटर बक्स जडान हुनेछ । जडानका लागि दुई जना प्राविधिक खटाइएको छ ।
निवेदनको आधारमा मिटर बक्स जडान गर्न लागिएको जानकारी गराउँदै उनले भने, ‘हालसम्म ८० वटा निवेदन परेका छन्, बाँकी संकलन हुँदैछ ।’
भूकम्पपश्चात गुप्सीपाखामा निर्माण भएको एकीकृत नमूना बस्ती र लाप्राकको पुरानो गाउँका सबै घरधुरीमा मिटर बक्स जडान गरिने उनले बताए । लाप्राकमा मात्रै करिव ६ सय घुरधुरी छन् ।
करिव चार वर्षअघि नै ११ केभी क्षमताको लाइन बिस्तार भएको लाप्राकमा विद्युत प्रवाह भने भएको थिएन । आवश्यक मर्मतसहित वितरण लाइन निर्माणको काम सम्पन्न गरेर बिहीवारबाट विद्युत प्रवाह गरिएको कार्यालय प्रमुख गुरुङले बताए । सिरानचोक गाउँपालिका–२ थालाजुङको ठुलस्वाँरास्थित सबस्टेसनबाट विद्युत प्रवाह गरिएको उनले जानकारी दिए । विद्युत प्रवाहका लागि तीन वटा ट्रान्सफर्मर राखिएको छ । गुप्सीपाखामा १०० केभीए क्षमताको एउटा र पुरानो बस्तीमा ५०/५० केभीए क्षमताको दुई वटा ट्रान्सफर्मर राखिएको उनले बताए ।
हाल लाप्राकीले लघुजलविद्युतबाट बिजुली बाल्दै आएका छन् । २० र २६ किलोवाटका दुई वटा लघुजलविद्युत भए पनि पावर नपुग्ने स्थानीयको गुनासो छ ।
केन्द्रीय प्रसारणको लाइन जडान भएकाले अबका दिनमा समस्या नहुने नेपाल विद्युत प्राधिकरणले जनाएको छ । ‘लघुजलविद्युतबाट बिजुली बाल्दा पावर नपुग्ने, वाइफाई समेत नचल्ने जस्ता समस्या थियो, अब केन्द्रीय प्रसारणको बिजुली बालेपछि त्यो समस्या आउँदैन,’ विद्युत् प्राधिकरण गोरखा वितरण केन्द्र प्रमुख गुरुङले भने ।
(function (d, s, id) var js, fjs = d.getElementsByTagName(s)[0]; if (d.getElementById(id)) return;
js = d.createElement(s);
js.id = id;
js.src = "https://connect.facebook.net/en_US/sdk.js";
fjs.parentNode.insertBefore(js, fjs);
(document, 'script', 'facebook-jssdk'));
Read More