१५ कात्तिक, गोरखा । मनास्लु पदमार्गमा ढुंगाले लागेर गम्भीर घाइते भएका पर्यटकको हेलिकप्टरबाट उद्धार गरिएको छ ।
सामागाउँबाट फर्कने क्रममा बिहीबार बिहान चुमनुब्री गाउँपालिका–५ बिही नजिकै माथिबाट खसेको ढुंगाले लागेर काठमाडौंको टोखा नगरपालिका–६ का ४४ बर्षीय मिनुइन्द्र लम्साल घाइते भएका थिए ।
उनको टाउँकोमा चोट लागेको र अवस्था गम्भीर रहेको प्रहरी नायब उपरीक्षक राजकुमार श्रेष्ठले बताए ।
‘उनीहरूसँग गएका साथीहरूले खबर गरेपछि इलाका प्रहरी कार्यालय लार्केबाट हाम्रो टोली त्यहाँ पुगेको हो,’ उनले भनेका छन् ।
प्रतिकूल मौसमका कारण सुरुमा उनको हेलिकप्टरबाट उद्धार हुन सकेको थिएन ।
सिम्रिक एयरको हेलिकप्टरबाट थप उपचारको लागि उनलाई काठमाडौं पठाइएको प्रहरीले जनाएको छ ।