थापाथलीको अनधिकृत संरचनामा चल्यो डोजर (तस्वीरहरू)

१४ कात्तिक, काठमाडौं । काठमाडौं महानगरपालिकाले थापाथलीको राममन्दिरमा बनाइएका अनधिकृत संरचना भत्काएको छ ।

महानगरपालिकाको टोलिले शुक्रबार सम्पदा क्षेत्र अधिग्रहण गरेर अनधिकृत रूपमा बनाइएको संरचना भत्काएको हो ।

सम्पदा क्षेत्र मिचेर बनाइएका अवैध संरचना भाडामा समेत लगाएपछि महानगरले खाली गर्न भनेको थियो ।  तर, संरचना यथावत् रहेपछि शुक्रबार महानगरको नगर प्रहरीसहितको टोलीले डोजर लगाएर भत्काएको छ ।

गुठी संस्थानको जग्गा अतिक्रमित गरेर बनाइएका संरचना हटाउन आग्रह गरेपनि नहटेपछि संस्थानले पनि महानगरको सहयोग मागेको थियो । महानगरले टहरमा बस्नेलाई बाहिर निकालेर अस्थायी संरचनालाई हटाएको छ ।

काठमाडौं महानगरपालिकाले बिहीबार नै एक सूचना जारी गरेर अतिक्रमित सार्वजनिक जग्गा र मापदण्ड विपरीतका संरचना हटाउने निर्णय अनुसार खाली गर्न चेतावनी दिएको थियो ।

‘स्थानीय सरकार सञ्चालन ऐन, २०७४ को परिच्छेद ७ र दफा ४५ विपरीत भवनजन्य संरचना निर्माण गर्न नहुने र सोही ऐनको दफा ९७ अनुसार सार्वजनिक जग्गा तथा सम्पत्तिको संरक्षण, विकास व्यवस्थापन  गर्ने जिम्मेवारी र दायित्व स्थानीय तहको भएकाले यस विपरीत भए/गरेका कार्यहरू सात दिनभित्र हटाइ सहयोग गरिदिन यसै सूचनाद्वारा जानकारी गराइन्छ,’ सूचनामा छ ।

महानगर क्षेत्रभित्र र सीमाना जोडिएका काठमाडौं जिल्ला भित्रका सार्वजनिक स्थानको अतिक्रमित तथा मापदण्ड विपरीतका संरचना आफैं नहटाए कारबाही गरी खाली गराउने चेतावनी दिइएको छ ।