लोकगायक अर्जुन सापकोटाले नयाँ गीत ‘झलिको’ सार्वजनिक गरेका छन्। मंगलबार सार्वजनिक भएको यस गीतमा सापकोटालाई गायनमा मेलिना राई र समीक्षा अधिकारीले साथ दिएका छन्।
गीतमा सन्तोष सापकोटाको शब्द रचना छ भने संगीत अर्जुन सापकोटा स्वयंको हो। कृष्ण रेउलेको थेगो रहेको गीतको संगीत संयोजन एचबीएन किस्मतले गरेका हुन्।
‘झलिको’ एक प्रेमगीत हो, जसका शब्दहरूले माया र प्रेम जोडीका भावनाहरूलाई व्यक्त गर्दछन्।
गीतको भिडिओमा भने परदेश गएको प्रेमी र गाउँमा रहेकी प्रेमिकाको कथालाई रोचक ढंगले देखाइएको छ। भिडिओमा परदेशबाट बाकसमा फर्किएको प्रेमको कथा देख्न सकिन्छ।
यसको भिडिओमा अर्जुन सापकोटा र कुसुम भण्डारीको अभिनय तथा नृत्य रहेको छ। साथमा शिवु पाण्डे, राजेन्द्र अर्याल, सन्तोष सापकोटा लगायतको पनि अभिनय छ।
भिडिओको कथा दीपा सिंखडा र विशाल घिमिरेले तयार पारेका हुन् भने निर्देशन विशालले गरेका छन्।
मुकेश नेपालीको कोरियोग्राफी रहेको भिडिओमा बुद्ध थापाको छायांकन र दिन्शन शाहको सम्पादन छ।
गायक अर्जुन सापकोटाले आफ्नै अफिसियल युट्युब च्यानलमार्फत यो गीत सार्वजनिक गरेका हुन्।