काठमाडौं, फागुन १०
राष्ट्रपति रामचन्द्र पौडेलले सोमबार राष्ट्रपतिको कार्यालय शितल निवासमा ब्रिगेड अफ गोरखाका कर्नेल कमान्डेन्ट मेजर जनरल जेराल्ड एम स्ट्रिकल्याण्डबाट गोर्खा ब्रिगेडको वार्षिक प्रतिवेदन ग्रहण गर्नुभएको छ ।
कार्यक्रममा राष्ट्रपति पौडेलले नेपाल र बेलायतले विश्व शान्तिका बारेमा साझा धारणा राखेको र संयुक्त राष्ट्रसंघको शान्ति स्थापना ढाँचामार्फत नजिकबाट सहकार्य गर्ने बताए । उनले प्रमुख विकास साझेदारका रूपमा बेलायतको निरन्तर सहयोगको प्रशंसा गर्दै बेलायतमा नेपालीको उपस्थितिले जनता–जनताबीचको सम्बन्धलाई मजबुत बनाएको उल्लेख गरे।
उहाँले कूटनीतिक र द्विपक्षीय संयन्त्रमार्फत सम्बन्धित समस्याको समाधान गर्ने र पेश प्रतिवेदनलाई सम्बन्धित निकायले अध्ययन गर्ने आश्वासन दिनुभयो ।
त्यस्तै गरी, मेजर जनरल स्ट्रिकल्याण्डले नेपाली गोर्खा सैनिकहरूलाई बेलायती समाजले गहिरो सम्मान गरेको कुरा उल्लेख गर्दै गोर्खाहरूको व्यावसायिकता र समर्पणको प्रशंसा गरे।