३० असोजमा राष्ट्रपति रामचन्द्र पौडेल, प्रधानमन्त्री सुशीला कार्की, शहीद परिवार, घाइते र केही जेनजी प्रतिनिधिबीच भएको छलफल । तस्वीर : प्रधानमन्त्रीको सचिवालय
६ कात्तिक, काठमाडौं । सरकार र जेनजीहरूबीच सम्झौता हुने भएको छ । राष्ट्रपति रामचन्द्र पौडेलसमेतको उपस्थितिमा सरकार र जेनजीहरूबीच सम्झौता हुन लागेको हो ।
सम्झौताका मस्यौदा तयार पार्ने काम लगभग अन्तिम चरणमा पुगिसकेको छ । सरकारी उच्च स्रोतका अनुसार, अहिले (बिहीबार) सम्म विभिन्न ८ वटा जेनजी समूहसँग सरकारले वार्ता गरिसकेको छ ।
उक्त मस्यौदाको ड्राफ्ट टुंग्याएर चाँडै जेनजीहरूसँग सरकारले वार्ता गर्दैछ । औपचारिक वार्ता राष्ट्रपतिकै उपस्थितिमा हुने र सोही वार्ताका क्रममा सम्झौता हुने तयारी गरिएको उक्त स्रोतले बताएको छ ।
खासगरी पछिल्लो पटक २५ असोजमा राष्ट्रपति निवासमा जेनजी युवाहरू छलफलका लागि पुगेका थिए । राष्ट्रपति रामचन्द्र पौडेल आकस्मिक बिरामी परेपछि प्रधानमन्त्री सुशीला कार्कीले केही जेनजी अगुवाहरूसँग उनीहरूको माग र सरकारले गर्नुपर्ने अन्य कामबारे सोधखोज गरेकी थिइन् ।
राष्ट्रपति पौडेल अस्पतालबाट फर्किएपछि पुन: अर्को वार्ता असोज ३० गते शीतलनिवासमै भएको थियो ।
प्रधानमन्त्री, मन्त्री, शहीद परिवारका सदस्य, घाइते र केही जेनजी अगुवाबीच उक्त दिन अबेरसम्म छलफल चलेको थियो । छलफलमा केही घाइते र शहीद परिवारका सदस्यहरू पनि थिए ।
सो छलफलमा केही उनीहरूले राष्ट्रपति र प्रधानमन्त्रीसँग आफूहरूलाई ‘आतंककारी’ भन्न थालिएको भन्दै गुनासो पोखे ।
‘हाम्रो आन्दोलनको वैद्यताका लागि पनि सम्झौता हुनुपर्यो । हामीले यत्रो धेरै रगत बगाएका छौं, तर अहिले तिनै पुराना दल र संगठनबाट आक्रमण बढ्न थाल्यो,’ उनीहरूको गुनासो थियो ।
प्रधानमन्त्री कार्की, गृहमन्त्री ओेम प्रकाश अर्यालसहितको सल्लाहमा खनालले विभिन्न समूहमा छरिएर रहेका विभिन्न ८ वटा समूहसँग छलफल गरिरहेका छन् ।
पछिल्लोसमय जेनजी आन्दोलनकारीमाथि जाहेरीहरू परिरहेका छन् । आन्दोलनलाई संस्थागत नगर्दा अपराधिकरण गर्ने जोखिम रहेको तर्क जेनजीहरूको थियो ।
उक्त विषयमा प्रधानमन्त्री कार्की सहमत भएकी थिइन् ।
जेनजी गुनासो सुनेपछि राष्ट्रपति रामचन्द्र पौडेलले समेत जननिर्वाचित सरकार, संसद् ढल्नदेखि राजनीति नै नयाँ कोर्समा पुगेको स्मरण गराउँदै आन्दोलनले वैद्यता भएको बताएका थिए ।
‘सम्झौता सबै लिखितम् मात्रै हुँदैन । तपाईंहरूकै आन्दोलनको जगमा संसद्, सरकार सबै गयो । यो भनेको नै आन्दोलनले वैद्यता पाएको हो,’ राष्ट्रपतिले सो छलफलमा राखेको भनाइ उद्धृत गर्दै एक मन्त्रीले भने, ‘म यो उमेरमा यति रातिसम्म तपाईंहरूकै लागि छलफल गरिरहेको छु । तपाईंहरूले जित्नुभएको छ ।’
छलफलमा सहभागी एक प्रतिनिधिका अनुसार राष्ट्रपति पौडेलले पहिलो महिला न्यायाधीश र पहिलो महिला प्रधानमन्त्री बन्ने क्रममा प्रधानमन्त्रीले भोग्नपरेको चुनौती साझा गर्दै केहीबेर तारिफ गरे ।
‘यस्तो प्रधानमन्त्री जोसँग अहिलेसम्म कुनै दाग छैन, अहिलेकै दलहरूसँग पनि उहाँले सम्झौता गर्नुपर्यो । तपाईंहरूले उहाँलाई अभिभावक पाउनुभएको छ,’ राष्ट्रपतिले भनेका थिए ।
प्रधानमन्त्री कार्कीले जेनजीका माग कुनै न कुनै रुपमा सम्बोधन हुनुपर्ने र आन्दोलनमा योगदान पुगेकाले राखेको मागको सम्बोधन सरकारले गर्ने बताएकी थिइन् ।
सोही अनुसार, प्रधानमन्त्री कार्कीले प्रमुख सल्लाहकार अजयभद्र खनाललाई यो कामको जिम्मेवारी दिएकी थिइन् । प्रधानमन्त्री कार्की, गृहमन्त्री ओेम प्रकाश अर्यालसहितको सल्लाहमा खनालले विभिन्न समूहमा छरिएर रहेका विभिन्न ८ वटा समूहसँग छलफल गरिरहेका छन् ।
सम्झौतामा राखिने कन्टेन्ट (विषयवस्तु) बारे भने छलफल भइरहेको र ड्राफ्टमा काम भएको एक मन्त्री बताउँछन् ।
विभिन्न फरकफरक समूहका मान्छेहरू जेनजी अगुवाका रुपमा देखिन थालेपछि खास आन्दोलनको अग्रमोर्चामा रहेका जेनजीहरूसँग सरकारले औपचारिकता खोजेको बताइन्छ ।
‘चाँडै केही दिनमै यो सम्झौता हुन्छ । शहीद, घाइते र अग्रमोर्चामा खटिएका खास जेनजीहरू सरकारसँग टाढिन हुँदैन,’ सरकारमा सहभागी एक मन्त्री भन्छन्, ‘जेनजीको माग पूरा गर्नका लागि पनि सम्झौताले झकझक्याउँछ ।’
(function (d, s, id) var js, fjs = d.getElementsByTagName(s)[0]; if (d.getElementById(id)) return;
js = d.createElement(s);
js.id = id;
js.src = "https://connect.facebook.net/en_US/sdk.js";
fjs.parentNode.insertBefore(js, fjs);
(document, 'script', 'facebook-jssdk'));
Read More