News Summary
Generated by OK AI. Editorially reviewed.
- फिल्म ‘सोल्टिनी’ले नयाँ गीत ‘सुन सोल्टिनी’ युट्युबमा सार्वजनिक गरेको छ।
- गीतमा शब्द तथा सङ्गीत प्रशान्त सिवाकोटीले तयार पारेका हुन् र नृत्य निर्देशन शिशिर खातीले गरेका छन्।
- फिल्मले अन्तरजातीय प्रेमकथा मार्फत सामाजिक विभेद र प्रेममा देखिने संघर्षलाई चित्रण गरेको छ।
काठमाडौं । प्रदर्शनको पूर्वसन्ध्यामा फिल्म ‘सोल्टिनी’ले नयाँ गीत ‘सुन सोल्टिनी’ युट्युबमा सार्वजनिक गरेको छ ।
एसडी योगी र बेनिशा पौडेलको स्वरमा रहेको यस गीतमा शब्द तथा सङ्गीत प्रशान्त सिवाकोटीको छ । नृत्य निर्देशन शिशिर खातीको छ ।
गीतमा अभिनेता प्रकाश सपुत र अभिनेत्री परीक्षा लिम्बुबिचको आकर्षक केमेस्ट्री, रमाइलो नृत्य र लोक पप शैलीको ताजगी झल्किने दृश्य देख्न सकिन्छ ।
गीतले कथाको पृष्ठभूमि झल्काउँदै दर्शकलाई मनोरञ्जन दिने अपेक्षा निर्माताले लिएका छन् । ’सोल्टिनी’ टिम हालै देशभरका विभिन्न सहरमा देउसीभैलो कार्यक्रममार्फत फिल्मको प्रवर्धन गरिरहेको छ ।
केन्द्रीय चलचित्र जाँच समितिबाट ’युनिभर्सल’ प्रमाणपत्र प्राप्त गरेको यो फिल्मलाई अर्जुन सुवेदीले निर्देशन गरेका हुन् ।
अन्तरजातीय प्रेमकथामा आधारित यस फिल्मले सामाजिक विभेद, समुदायबिचको असमानता र प्रेममा देखिने संघर्षलाई चित्रण गरेको छ ।
फिल्ममा विल्सनविक्रम राई, रवीन्द्र झा, सुन्दर धिताल, सुजन खतिवडा, सबु गुरुङ, प्रकाश घिमिरे, प्रेम सुब्बा र कविता आलेको पनि अभिनय देख्न पाइनेछ ।