काठमाडौं, अप्रिल ३०
सरकारले नेपालमा विद्यालय शिक्षा सुधार गर्न फिनल्याण्ड सरकारसँग सहकार्य गर्न प्रस्ताव गरेको छ।
शिक्षा, विज्ञान तथा प्रविधिमन्त्री सस्मित पोखरेल र नेपालका लागि फिनल्याण्डका राजदूत पेट्री पुहक्काबीच आज मन्त्रालयमा भएको शिष्टाचार भेटमा उक्त प्रस्ताव राखिएको हो।
नेपाल र फिनल्याण्डबीचको लामो समयदेखिको सुमधुर सम्बन्धलाई प्रकाश पार्दै उनले नेपालको विकासमा फिनल्यान्ड सरकारलाई निरन्तर सहयोग गरेकोमा धन्यवाद दिए।
सरकारका प्रवक्तासमेत रहेका मन्त्री पोखरेलले सरकारका प्राथमिकता र आगामी कार्यक्रमबारे जानकारी दिँदै फिनल्याण्डले नेपालको शिक्षा क्षेत्रमा थप सहयोग गर्ने विश्वास व्यक्त गरे। आगामी दिनमा शिक्षा लगायतका विभिन्न क्षेत्रमा ।
बैठकमा द्विपक्षीय सम्बन्ध र विकास सहायता परिचालन लगायतका विविध विषयमा छलफल भएको थियो ।
त्यस्तै राजदूत पुहक्काले आगामी ५ वर्षमा नेपालको शिक्षा क्षेत्रमा फिनल्याण्ड सरकारले सहयोग जारी राख्ने प्रतिबद्धता व्यक्त गरे । विद्यालय शिक्षा क्षेत्र योजना र शिक्षक शिक्षा कार्यक्रम हाल फिनल्याण्डको सहयोगमा कार्यान्वयन भैरहेको छ।
अटिजम र समावेशी शिक्षामा फिनल्याण्डको विशेषज्ञता रहेको र नेपाल सरकारले अटिजम विद्यालय स्थापना गर्ने नीति लिएकाले त्यस क्षेत्रमा सहकार्य गर्न इच्छुक रहेको उनले उल्लेख गरे।