काठमाडौं, साउन १०
विहीबार त्रिपुरेश्वरस्थित राहदानी विभागबाहिर आत्मदाह गर्ने प्रयासमा गम्भीर घाइते भएका २५ वर्षीय गणेश नेपालीको शुक्रबार वीर अस्पतालमा उपचारका क्रममा मृत्यु भएको हो ।
काठमाडौं प्रहरीका प्रवक्ता एसपी पवन भट्टराईले मृत्युको पुष्टि गरे भने अस्पताल प्रशासनले आधिकारिक बयान जारी गर्न बाँकी छ।
मुगुको सोरु गाउँपालिका–१ निवासी नेपालीको अनुहार, टाउको, घाँटीलगायत शरीरको करिब ५५-६० प्रतिशत भाग जलेको थियो। जलेका कारण श्वासप्रश्वासमा गम्भीर समस्या देखिएपछि उनलाई वीर अस्पतालको बर्न सेन्टरमा भर्ना गरिएको केही समयपछि मेकानिकल भेन्टिलेसनमा राखिएको थियो।
अस्पतालको प्लास्टिक सर्जरी विभागका संयोजक डा पियुष दाहालको नेतृत्वमा २१ सदस्यीय बहुविषय टोलीले उनको उपचार गरिरहेको थियो। सरकारले उनलाई विशेष उपचारका लागि नयाँ दिल्लीस्थित अल इण्डिया इन्स्टिच्युट अफ मेडिकल साइन्सेस (एम्स) लैजाने व्यवस्था पनि गरेको थियो र सबै उपचार खर्च बेहोर्ने वाचा गरेको थियो। तर, उनको अवस्था यात्राका लागि निकै अस्थिर रहेको भन्दै चिकित्सकले तत्काल सरुवा नगर्न सल्लाह दिएका थिए।
बिहीबार दिउँसो राहदानी विभागबाहिर नेपालीले आफूमाथि पेट्रोल खन्याएर आगो लगाएका थिए । उनलाई घटनास्थलबाट उद्धार गरी वीर अस्पताल लगिएको थियो ।
प्रहरीका अनुसार नेपाली श्रीमती र छोरीसँग भक्तपुरमा बस्दै राइड सेयरिङ ड्राइभरको काम गर्दै आएका थिए । प्रारम्भिक प्रतिवेदनमा उनको मोटरसाइकललाई लिएर काठमाडौं महानगरपालिकाले ह्वील क्ल्याम्प गरेको भन्दै विवाद भएपछि घटना भएको देखाएको छ।
घटनाबारे थप अनुसन्धान भइरहेको प्रहरीले जनाएको छ।