काठमाडौं, ३ जेठ
लगभग रु ५५ लाख बराबरको विदेशी मुद्रासहित मलेसिया उड्ने क्रममा त्रिभुवन अन्तर्राष्ट्रिय विमानस्थलबाट मंगलबार एक जनालाई प्रहरीले पक्राउ गरेको छ ।
पक्राउ पर्नेमा सुनसरीको गढी गाउँपालिका–१ का ५० वर्षीय कमलनारायण विश्वास रहेको प्रहरीले जनाएको छ ।
मलेसिया जाने बाटिक एयरको विमानमा चढ्ने तयारीका क्रममा अन्तर्राष्ट्रिय प्रस्थान गर्ने ब्यागेज स्क्रिनिङ क्षेत्रबाट उनलाई पक्राउ गरिएको प्रहरीले जनाएको छ ।
प्रहरीले नेपाली रुपैयाँ १४ हजार ८५० अमेरिकी डलर, जापानी येन ४१ हजार, स्विस फ्रान्क १ हजार, मलेसियाली रिङ्गिट २३ हजार ६३२, श्रीलंकाली रुपैयाँ ७ हजार ७७०, पाकिस्तानी रुपैयाँ ३ हजार ५ सय ४० रुपैयाँ र ओमानी रियाल ९० हजार रुपैयाँ बरामद गरेको छ । थप अनुसन्धान र कानुनी कारबाहीका लागि ललितपुरको हरिहरभवनस्थित राजस्व अनुसन्धान विभागमा पठाइएको छ।