राष्ट्रिय
समाचार.
- मकवानपुरमा सुरु भएको एन्फा प्रेसिडेन्ट लिगमा चित्लाङ एफसीले देउराली युथ क्लबलाई ४-१ ले हराउँदै विजयी सुरुवात गरेको छ ।
- विजय स्पोर्ट्स क्लब र लालिगुराँस एसोसिएसन क्लबले गोलरहित बराबरी खेल्दै अंक बाँडेका छन् ।
- एन्फा प्रेसिडेन्ट लिगमा १० टोली दुई समूहमा विभाजन गरेर खेलाइनेछ र सेमिफाइनल पुग्ने टिम राष्ट्रिय लिगका लागि छनोट हुनेछन् ।
१९ कात्तिक, काठमाडौं । मकवानपुरमा बुधबारदेखि सुरु भएको एन्फा प्रेसिडेन्ट लिगमा चित्लाङ एफसीले विजयी सुरुवात गरेको छ ।
समूह ए अन्तर्गत हेटौँडाको गौरिटार रंगशालमा भएको पहिलो खेलमा चित्लाङले देउराली युथ क्लबलाई ४-१ ले हरायो ।
चित्लाङका लागि चन्दन कुमार दासले ३२औं मिनेटमा गोल गरी अग्रता दिलाएका थिए । , लाहान सुब्बा पाताङ्ग्वा र विज्ञान खड्काले पहिलो हाफको इन्जुरी टाइममा गोल गरे । मदन स्याङ्गतानले ८८औं मिनेटमा गोल गरे ।
देउरालीका लागि रामचन्द्र वाजीले दोस्रो हाफको इन्जुरी टाइममा सान्तवना गोल फर्काए ।
यस्तै बुधबारै भएको समूह ए को दोस्रो खेलमा विजय स्पोर्ट्स क्लब र लालिगुराँस एसोसिएसन क्लबले गोलरहित बराबरी खेल्दै अंक बाँडेका छन् ।
एन्फा प्रेसिडेन्ट लिगमा जिल्ला लिगबाट च्याम्पियन हुँदै प्रदेश लिगबाट छनोट भएका १० क्लबले सहभागिता जनाएका छन् । १० टोलीलाई दुई समूहमा विभाजन गरेर खेलाइनेछ । सेमिफाइनल पुग्ने चार टिम पुष ९ गतेदेखि सुरु हुने राष्ट्रिय लिगका लागि छनोट हुनेछ ।
