काठमाडौं, वैशाख २९
चीनले काठमाडौं चक्रपथ विस्तार आयोजनाको दोस्रो चरणको लागि ११ अर्ब रुपैयाँ अनुदान दिने प्रतिबद्धता जनाएको छ।
भौतिक पूर्वाधार तथा यातायात तथा शहरी विकास मन्त्रालयका अनुसार बुधबार मन्त्रालयमा मन्त्री सुनिल लम्साल र नेपालका लागि चिनियाँ राजदूत झाङ माओमिङबीच यस सम्बन्धमा सम्झौता भएको हो । कोटेश्वरदेखि कलङ्कीसम्म आयोजनाको पहिलो चरणको काम सकिएको छ।
हस्ताक्षर कार्यक्रममा बोल्दै मन्त्री लम्सालले सरकारले आयोजनाको सहज कार्यान्वयन सुनिश्चित गर्ने र आएका चुनौतीलाई तत्काल सम्बोधन गर्ने बताए । उनले नेपालको पूर्वाधार क्षेत्रमा चिनियाँ लगानी बढ्ने विश्वास व्यक्त गर्दै उत्तर–दक्षिण कनेक्टिभिटीको विकास सरकारको प्राथमिकतामा रहेको उल्लेख गरे ।