‘माओवादीसँग एकताको पक्षमा ९९ प्रतिशत, एक-दुईटा बियाँ त भेटिइहाल्छन्’

१३ कात्तिक, काठमाडौं । एकीकृत समाजवादीको राजधानीमा जारी केन्द्रीय समिति बैठकमा नेकपा माओवादी केन्द्रसँग एकता गर्ने औपचारिक प्रस्ताव पेस भएपछि नेताहरु पक्ष र विपक्षमा विभाजित भएका छन् ।

अध्यक्ष माधव कुमार नेपाल पक्षका नेताहरु माओवादीसँग पार्टी एकताको पक्षमा र सम्मानित नेता झलनाथ खनाल पक्षका नेताहरु विपक्षमा उभिएका छन् । नेताहरूका अनुसार यो कलहले पार्टी नै फुटको संघारमा पुगेको छ ।

आजको बैठकमा झलनाथ खनाल र महासचिव घनश्याम भुसालले धारणा राख्दैछन् । त्यसपछि अन्य पदाधिकारी र केन्द्रीय सदस्य लगायतले धारणा राख्ने छन् ।

यसै सन्दर्भमा नेकपा एकीकृत समाजवादीका उपमहासचिव मेटमणि चौधरीसँग अनलाइनखबरले संक्षिप्त कुराकानी गरेको छ –

तपाईं माओवादीसँग एकताको पक्षमा कि विपक्षमा ?

म त कम्युनिष्ट पार्टीहरुसँग एकता गर्दै जानुपर्छ भन्ने पक्षमा हो । त्यो काम सुरु गरिहालौं भन्ने मेरो भनाइ हो । पार्टीबाट हुने निर्णय पनि यही हो ।

तपाईंको भनाइ अनुसार एकीकृत समाजवादीले माओवादी केन्द्रसँग पार्टी एकता गरेर जाने निर्णय गर्छ ।

हो । त्यो ठाउँमा पुग्छौं हामी ।

झलनाथ खनाल पक्षकाले त माओवादीसँग अहिले नै एकता गर्नु हुँदैन भन्नुभएको छ नि ?

लाखमा, हजारमा त एक–दुईटा फरक कुरा निस्किन्छ नि । ९९ प्रतिशत एकढिक्का हुँदा एक प्रतिशतले अर्कोतिर मुख फर्काइरहेको हुन्छ । त्यो त स्वाभाविक हो नि ।

माओवादी केन्द्रसँग एकता गरेर जानुपर्छ भन्ने पक्षमा एकीकृत समाजवादीका ९९ प्रतिशत छन् भन्न खोज्नु भा हो ?

हो । त्यो लगभग सबै हो नि । बोरामा एक–दुईटा बियाँ त भटिनुलाई स्वाभाविक रुपमा लिनुपर्छ ।

एकतापछि बन्ने नयाँ पार्टीको नाम के हुन्छ ?

विभिन्न प्रस्तावहरु छन् । त्यसमा तीन–चारवटा विकल्पमा छलफल भइरहेको छ । समाजवादी चाहिँ रहन्छ ।

नाम नेकपा समाजवादी रहन्छ ?

त्यो सम्भावना बढी छ । एकतापछि बन्ने नयाँ पार्टीको नाम नेकपा समाजवादी नै हुन्छ होला ।

चुनाव चिह्न के राख्ने ?

हामीले कलम नै राख्ने भनिराखेका छौं । माओवादी केन्द्रले तारा भनिराखेको छ । हेरौं के हुन्छ ।

कहिलेसम्म होला एकता ?

आगामी मंसिरमा एकता महाधिवेशन गर्छौं र चुनावमा जान्छौं ।

नेताहरुको व्यवस्थापन कसरी हुन्छ ?

त्यसमा छलफल भइरहेको छ । एकता महाधिवेशनमा सबै कुरा टुंगिन्छ ।