२० माघ, हुम्ला । आगामी फागुन २१ गते प्रतिनिधिसभा निर्वाचन हुँदैछ । यसका लागि निर्वाचन आयोगले आवश्यक तयारी गरिरहेको छ । आयोगले मतदान केन्द्र, मतदान स्थलहरूको टुंगो लगाइसकेको छ
निर्वाचन आयोगले १६५ वटै निर्वाचन क्षेत्रको मतदाताको संख्या पनि टुंगो लागिसकेको छ ।
हरेक गाउँमा निर्वाचन गतिविधि बढिरहँदा हुम्लाको लिमीको जाङ गाउँ भने सुनसान छ । उत्तरी हुम्लाको नाम्खा गाउँपालिका-६ को लिमिको जाङ गाउँ अहिले रित्तै छ । १० वर्षअघि ६७ घरधुरी रहेको जाङ गाउँ अहिले भने खाली छ ।
तीन वटा मतदान स्थल रहेकाे लिमि जाँङ गाउँकाे भृकुटी आधारभुत विद्यालयकाे मतदान स्थलमा २४७ मतदाता संख्या रहेको तथ्यांक छ । तर, मतदाता गाउँमा छैनन् । यता नाम्खा गाउँपालिका-६ को हल्जी पनि अहिले सुनसान छ । हिमपात नहुँदा गाउँका केही घरमा मान्छे बस्ने भए पनि अहिले चिसो झल्न गाउँ छोडिसकेका छन् ।
यहाँको सुनखानी आधारभूत विद्यालयको हल्जी मतदान स्थलमा २९३ जना मतदाता भए पनि अधिकांश काठमाडौं, भारतका विभिन्न सहर गएका छन् ।
त्यस्तै तिलमामा रहेको हिमशिखर आधारभूत विद्यालय मतदान स्थलमा मतदान गर्नेको सूची १३२ छ । तर अधिकांश चीनकाे ताक्लाकाेट, काठमाडौं, भारतको दिल्लीलगयातका सहरमा छन्।
हुम्लाका प्रमुख जिल्ला अधिकारी टेककुमार रेग्मीले उत्तरी भेगमा अहिलेको अवस्थामा निर्वाचन गराउन नसकिनेबारेको जानकारी गृहमन्त्रालय र निर्वाचन आयोगलाई गराइसकेको बताए ।
‘हामी निर्वाचन गराउने भनेर तयारी अवस्थामै छौं । कानुनमा मतदान स्थलमा कति मतदाता हुँदा मतदान गराउने/नगराउने भन्ने उल्लेख छैन,’ उनले अनलाइनखबरसँग भने, ‘यसबारे गृहमन्त्रालय र निर्वाचन आयोगलाई पटक-पटक जानकारी गराइसकेका छौं । माथिबाट केही निर्देशनात्मक कुरा आउला त्यसैअनुसार गरौँला भनेर बसेका छौं ।’
उनले उत्तरी क्षेत्रका केही गाउँमा अहिले केही मान्छे बसिरहेको भए पनि ती ठाउँमा जान-आउन सक्ने अवस्था नभएको बताए ।