काठमाडौं, मंसिर १२
प्रधानमन्त्री सुशीला कार्कीले आगामी प्रतिनिधिसभा सदस्य निर्वाचनको तयारीका सम्बन्धमा निर्वाचन आयोगका पदाधिकारीसँग आज छलफल गर्नुभएको छ ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको बैठकमा आयोगका कार्यवाहक प्रमुख आयुक्त रामप्रसाद भण्डारी, आयुक्त डा जानकीकुमारी तुलाधर, सगुन शमशेर राणालगायत वरिष्ठ अधिकारी सहभागी थिए । हालसम्मको प्रगतिका आधारमा आयोगले फागुन ५ गते तोकिएको मितिअनुसार निर्वाचन हुने विश्वास व्यक्त गरेको छ।
कार्यवाहक प्रमुख आयुक्त भण्डारीले नयाँ राजनीतिक दल दर्ता, नयाँ मतदाता समावेशी लगायत मतदाता नामावली अद्यावधिक गर्ने काम सुचारु रुपमा अघि बढेको जानकारी दिनुभयो । “निर्वाचन तोकिएको मितिमा गर्न सम्भव छ र त्यसको व्यवस्थापन गर्न आयोग पूर्ण सक्षम छ”, उनले भने।
मतदाता दर्ताको बढ्दो मागलाई सम्बोधन गर्न आयोगले बिहान ७ बजेदेखि बेलुका ७ बजेसम्म दुई सिफ्टमा काम गर्ने, जनशक्ति बढाउने र अनलाइनमार्फत प्राविधिक समस्या समाधानका लागि सञ्चारमाध्यमको व्यवस्था गरेको छ । यसैबीच राष्ट्रिय पञ्जीकरण विभागका महानिर्देशक नामराज घिमिरेले राष्ट्रिय परिचयपत्र वितरणका लागि सङ्कलन गरिएको बायोमेट्रिक तथ्याङ्क आयोगलाई उपलब्ध गराउन विभाग तयार रहेको जानकारी दिनुभयो । यो एकीकरणका लागि सबै प्राविधिक तयारी र प्रणालीको परीक्षण आज रातिसम्म सम्पन्न हुने पनि यसले पुष्टि गरेको छ।
अहिलेसम्म २२ राष्ट्रिय र दुई अन्तर्राष्ट्रिय पर्यवेक्षक संस्थाले आगामी निर्वाचनको अनुगमनका लागि आवेदन दिएका छन् । त्यसैगरी, निर्वाचन आचारसंहिताको मस्यौदा राजनीतिक दलहरूबीच प्रतिक्रियाका लागि परिचालित भइसकेको र निर्वाचनको अन्तिम कार्यतालिका छिट्टै सार्वजनिक गर्ने तयारीमा छ ।
बैठकमा प्रधानमन्त्री कार्कीले उम्मेदवारको खर्च सीमा घटाउने र घर बाहिरका मतदातालाई सहजताका लागि अन्तरजिल्ला मतदान शुरु गर्नेबारे जानकारी गराएका थिए ।