५ कात्तिक, हुम्ला । चंखेली गाउँपालिका- ५ स्थित नेप्का गाउँका स्थानीयवासी टाँके भ्याली पुग्न जोखिमको यात्रा गर्न बाध्य छन् ।
टाँके भ्याली जाने बाटोमा खोलाहरू तर्नु पर्ने तर पुल नहुँदा उनीहरुले जोखिमको यात्रा गर्न बाध्य भएका हुन् ।
नेप्कावासी पशुवस्तु पाल्न र चिनको हरियाचौर व्यापार गर्न टाँके भ्याली पुग्नुपर्छ । तर, त्यहाँ पुग्न दर्जनौं ठाउँमा खोला तर्नुपर्छ । ती खोला काठका बला तेर्स्याएर बनाइएका जोखिमपूर्ण काठेपुलको सहायतामा तर्नुपर्छ ।
नागरिकहरू तिनै काठेपुलको जोखिम मोल्दै टाँके पुग्ने गरेको बताउँछन् चंखेली गाउँपालिका-५ का जसबहादुर तामाङ । टाँके भ्याली पुग्न खोला नालाहरूमा झुलुङे पुल पनि नहुँदा बर्खाको समयमा खोला बढ्दा समस्या हुने गरेको उनको भनाइ छ ।
यता जनप्रतिनिधिहरू भने टाँके पुग्दा हेलिकप्टर चार्टर गरेर जान्छन् । चिनको हरियाचौरमा हाट बजार लाग्दा गाउँपालिका अध्यक्ष प्यारीलाल शाहीको टोली ९ लाख खर्चेर हेलिकप्टरमा पुगेका थिए ।
यसरी जनप्रतिनिधिले हेलीकप्टर चार्टरमै ठूलो रकम खर्च गर्नभन्दा पुल निर्माण गरेको भए नागरिकले सास्ती भोग्न नपर्ने स्थानीयवासीको भनाइ छ ।