राष्ट्रिय
समाचार.
- नेपाल वायुसेवा निगम सञ्चालक समितिका अध्यक्ष विक्रम राईले संस्कृति, पर्यटन तथा नागरिक उड्डयन मन्त्रालयमा पद तथा गोपनीयताको शपथ लिएका छन्।
- नवनियुक्त अध्यक्ष राईले निगमको ए ३२० जहाजको इन्जिन मर्मतका लागि इजरायल पठाइएको इन्जिन १५ दिन भित्र जडान गर्न निर्देशन दिए।
- राईले करार तथा ज्यालादारीमा नियुक्त कर्मचारीलाई नियमसङ्गत बदर गर्न निर्देशन दिएका छन्।
१८ कात्तिक, काठमाडौं । नेपाल वायुसेवा निगम सञ्चालक समितिका नवनियुक्त अध्यक्ष विक्रम राईले पद तथा गोपनीयताको शपथ लिएका छन् ।
मंगलबार संस्कृति, पर्यटन तथा नागरिक उड्डयन मन्त्रालयका निमित्त सचिव इन्दु घिमिरेसँग उनले पद तथा गोपनीयताको शपथ लिएका हुन् । कार्यक्रममा निमित्त सचिव घिमिरेले निगमलाई सुधारको बाटोमा अगाडि बढाउँदै व्यवस्थित पद्धतिको थालनी गर्ने जिम्मेवारी निगम सञ्चालक समितिका अध्यक्ष, सदस्य तथा निमित्त महाप्रबन्धकको काँधमा आएको बताइन् ।
नवनियुक्त अध्यक्ष राईले अहिलेको विषम परिस्थितिमा प्रधानमन्त्री र संस्कृति, पर्यटन तथा नागरिक उड्डयन मन्त्रालयले गरेको भरोसा तथा विश्वासले अध्यक्षको जिम्मेवारी प्राप्त भएको बताए । उनले निकट भविष्यमा ठोस उपलब्धिमूलक काम गर्ने प्रतिवद्धता व्यक्त गरे ।
मन्त्रालयमा शपथ ग्रहण गरेपश्चात् अध्यक्ष राईले निगमको सञ्चालक समितिको कार्यालयमा कार्यभार ग्रहण गरे । सो क्रममा अध्यक्ष राईले हाल ए ३२० जहाजमा प्रयोग हुँदै आएको भाडाको एउटा इन्जिन सम्बन्धित कम्पनीलाई फिर्ता गर्दै मर्मतका लागि इजरायल पठाइएको निगमको इन्जिन जडान गर्ने कार्य १५ दिनभित्र सुरु गरी यथाशक्य चाँडो टुङ्ग्याउन निर्देशन दिए । उनले प्रश्न उठेका करार तथा ज्यालादारीमा नियुक्त कर्मचारीलाई नियमसङ्गत बदर गर्न समेत निर्देशन दिए ।